ती सध्या काय करते - १

कधी बनते ती कवडसा
            खिडकीमधूनी डोकावणारा,
माझ्याच घरात डोकावून
            मलाच परकं करून जाणारा....!!

कधी बनते ती चुंबळ
             घागरीला सांभाळणारी,
घागरीला सांभाळता सांभाळता
              माझ्याच मनाला सुरूंग लावणारी....!!

कधी बनते ती झोका हवेचा
               मंद झुळझुळ वाहणारा,
नकळत वाहता वाहता
               आठवणींवर फुंकर घालणारा....!!

कधी बनते ती फुलपाखरू
                निरागस स्वच्छंद बागडणारं,
स्वच्छंद बागडता बागडता
                निरर्थक वास्तव डोळ्यांसमोर मांडणारं....!!
              
कधी बनते ती रेती
               मुठीत कधीही न मावणारी,
मुठीतून निसटता निसटता
               आयुष्याची ऊकल कोकलून सांगणारी....!!

                                              

                                  -©- निरागस